മലപ്പുറം: രണ്ട് വർഷം കൂടുമ്പോൾ കൂടുമ്പോൾ പുതുക്കേണ്ട അംഗത്വം പുതുക്കൽ നടക്കാതായതോടെ മുസ്ലിം ലീഗിന്റെ വിദ്യാർത്ഥി സംഘടനയായ എംഎസ്എഫിനുള്ളിൽ മുറുമുറുപ്പ്. ആറ് വർഷമായിട്ടും അംഗത്വം പുതുക്കാനുള്ള നടപടിയുണ്ടാകാത്തതിലാണ് സംഘടനയ്ക്കുള്ളിൽ നിന്ന് തന്നെ എതിർപ്പ് തുടങ്ങിയിരിക്കുന്നത്. രണ്ട് വർഷം കൂടുമ്പോള്‍ അംഗത്വം പുതുക്കണമെന്നാണ് സംഘടനയുടെ ഭരണഘടന വ്യക്തമാക്കുന്നത്.
നിലവിലെ എംഎസ്എഫ് കമ്മിറ്റികൾ രൂപികരിച്ചിട്ട് ആറ് വർഷമായിട്ടും പുനഃസംഘടന നടക്കുന്നില്ലെന്നും പ്രവർത്തകർ ആരോപിക്കുന്നു. കമ്മിറ്റികളുടെയും കാലാവധി രണ്ട് വർഷമാണ്. പഞ്ചായത്ത്, യൂണിറ്റ്, മണ്ഡലം കമ്മിറ്റികൾ നിലവിൽ വന്നിട്ട് ആറ് വർഷമായി. ജില്ലാകമ്മിറ്റികൾ രൂപീകരിച്ചിട്ട് അഞ്ച് വർഷമായും സംസ്ഥാനകമ്മിറ്റികൾ രൂപീകരിച്ച് നാല് വർഷവുമായി.
2018ലാണ് അവസാനമായി അംഗത്വം പുതുക്കിയത്. ഇക്കാര്യം സംസ്ഥാന കമ്മിറ്റിയിലടക്കം ചർച്ചയായിട്ടും നടപടിയുണ്ടായിട്ടില്ല. നിലവിലെ ഭാരവാഹികള്‍ തന്നെ തുടരാൻ അവസരം നൽകാനാണ് അംഗത്വം പുതുക്കാത്തതെന്ന ആരോപണം ഉയരുന്നുണ്ട്. മാത്രമല്ല, അംഗത്വ പ്രായപരിധി 30 ൽ നിന്ന് ഉയ‍ർത്താനുള്ള ശ്രമവും നടക്കുന്നുണ്ടെന്ന ആരോപണവും ഉയരുന്നുണ്ട്.
എന്നാൽ കൊവിഡ് കാരണമാണ് പോഷക സംഘടനകളിലെ അംഗത്വ വിതരണം വൈകിയതെന്നാണ് നേതൃത്വത്തിന്റെ വിശദീകരണം. അംഗത്വ ക്യാമ്പയിനുള്ള നടപടികൾ തുടങ്ങിയെന്നും ഉടൻ പ്രഖ്യാപനമുണ്ടാകുമെന്നും സംസ്ഥാന നേതൃത്വം വ്യക്തമാക്കുന്നു.
