ചെന്നൈ: പാമ്പുകടിയേറ്റ 13 വയസ്സുകാരി എട്ടു കിലോമീറ്റർ അകലെയുള്ള ആശുപത്രിയിലേയ്ക്ക് കൊണ്ടുപോകുന്നതിനിടെ മരിച്ചു. ധർമപുരി ജില്ലയിൽ പെന്നാഗരത്തെ ഒരു മലയോര ഗ്രാമത്തിലാണ് സംഭവം. കസ്തൂരി എന്ന പെൺകുട്ടിയാണ് അടിസ്ഥാന സൗകര്യങ്ങളുടെ അഭാവത്താൽ മരിച്ചത്. പാമ്പുകടിയേറ്റ കസ്തൂരിയെ വാഹന സൗകര്യം ഇല്ലാത്തതിനാൽ തുണിത്തൊട്ടിലിലാണ് നാട്ടുകാർ ആശുപത്രിയിലേക്ക് കൊണ്ടുപോയത്.
റോഡ് സൗകര്യമില്ലാത്തതാണ് കൗമാരക്കാരിയുടെ മരണത്തിനു ഇടയാക്കിയതെന്ന് നാട്ടുകാർ പറഞ്ഞു. ആശുപത്രിയിൽ എത്തിക്കാനാവാതെ ഇതിനുമുമ്പും ഗ്രാമത്തിൽ പലരും മരിച്ചിട്ടുണ്ടെന്നും നാട്ടുകാർ അറിയിച്ചു. സർക്കാർ സഹായിക്കണമെന്നും അവർ അഭ്യർത്ഥിച്ചു. ഗ്രാമത്തിൽ 40 കുടുംബങ്ങളിലായി 200 പേരെങ്കിലും താമസിക്കുന്നുണ്ടെന്നാണ് വിവരം. ഗ്രാമത്തിൽ നിന്നുള്ള 60-ലധികം കുട്ടികൾ എല്ലാ ദിവസവും 15 കിലോമീറ്ററോളം ചെളി നിറഞ്ഞ റോഡുകളിലൂടെ നടന്നാണ് അടുത്തുള്ള സ്കൂളിലെത്തുന്നത്. കൂലിപ്പണിക്കാരായ ഗ്രാമീണർക്ക് ഉപജീവനത്തിനായി കാൽനടയായി കുന്നിറങ്ങി വേണം നഗരത്തിലെത്താൻ.
