ഇതുവരെ 13 തവണ ഇരുടീമുകളും ഏറ്റുമുട്ടിയതിൽ എട്ടിലും ജയം ബെംഗളൂരുവിനായിരുന്നു
കൊൽക്കത്ത: ഡ്യൂറൻഡ് കപ്പിൽ ബെംഗളൂരു എഫ്സിക്കും കേരള ബ്ലാസ്റ്റേഴ്സിനും ഇന്ന് ജയം അനിവാര്യം. കൊല്‍ക്കത്തയിലെ കിഷോര്‍ ഭാരതി ക്രിരംഗന്‍ സ്‌റ്റേഡിയത്തില്‍ വൈകിട്ട് ആറ് മണിക്ക് നടക്കുന്ന മത്സരത്തിൽ ഇരുടീമുകളും ഏറ്റുമുട്ടും. ഇന്ത്യൻ എയർ ഫോഴ്സിനെതിരായ ആദ്യ മത്സരം സമനിലയിൽ ആയതോടെ ഒരു പോയിന്റുള്ള ബെംഗളൂരു ഗ്രൂപ്പിൽ രണ്ടാമതാണ്. ആദ്യ മത്സരത്തിൽ ഗോകുലത്തോട് തോറ്റ കേരളം നാലാം സ്ഥാനത്തും. രണ്ട് മത്സരങ്ങളും ജയിച്ച ഗോകുലം എഫ്സിയാണ് ഗ്രൂപ്പിൽ ഒന്നാമത്. ക്വാർട്ടർ ഫൈനൽ ലക്ഷ്യമിടുന്ന ബ്ലാസ്റ്റേഴ്സിനും ബെംഗളൂരുവിനും ഇനിയുള്ള രണ്ട് മത്സരങ്ങളിലും ജയം അനിവാര്യമാണ്. പ്രതിരോധത്തിൽ പിഴവുകൾ വരുത്തിയതാണ് ആദ്യ മത്സരത്തിൽ ബെംഗളൂരു സമനില വഴങ്ങാൻ കാരണം. മത്സരത്തിന്റെ 20-ാം മിനിറ്റിൽ തന്നെ എയർഫോഴ്സ് ടീം മുന്നിലെത്തിയിരുന്നു. മത്സരത്തിലേക്ക് തിരികെ വരാൻ ബെംഗളൂരു ന‌ടത്തിയ ശ്രമങ്ങൾ 58-ാം മിനിറ്റിൽ ഫലം കണ്ടു. സമനില ഗോൾ നേടിയെങ്കിലും മത്സരം ജയിച്ചുകയറാൻ ബെംഗളൂരുവിന് കഴിഞ്ഞില്ല. പ്രതിരോധത്തിനൊപ്പം മുന്നേറ്റവും ബ്ലാസ്റ്റേഴ്സിന് ശക്തിപ്പെടുത്തേണ്ടതുണ്ട്. ഗോകുലത്തിനെതിരെ ആദ്യ പകുതിയിൽ തന്നെ കേരളം മൂന്ന് ഗോൾ വഴങ്ങിയിരുന്നു. ബ്ലാസ്റ്റേഴ്സ് മത്സരത്തിലേക്ക് തിരികെ വന്നെങ്കിലും 3-4 ന് മത്സരം തോറ്റു. ചില അവസരങ്ങൾ ഗോളാക്കി മാറ്റാൻ കഴിയാതിരുന്നത് ബ്ലാസ്റ്റേഴ്സ് മുന്നേറ്റ നിരയുടെ പരാജയമായി. ഇതുവരെ 13 തവണ ബെംഗളൂരുവും കേരളവും നേർക്കുനേർ വന്നിട്ടുണ്ട്. ഇതിൽ എട്ട് തവണയും ബെംഗളൂരുവിനായിരുന്നു ജയം. മൂന്ന് മത്സരങ്ങൾ ബ്ലാസ്റ്റേഴ്സ് ജയിച്ചപ്പോൾ രണ്ട് മത്സരങ്ങൾ സമനിലയിലായി.
