കൊയിലാണ്ടി: ബൈക്കിൽ യാത്രചെയ്ത യുവാവിന് ഹെൽമെറ്റിനുള്ളിൽ കടന്നുകൂടിയ പാമ്പിന്റെ കടിയേറ്റു. നടുവത്തൂർ കൊളപ്പേരി രാഹുലിനാണ് (30) കടിയേറ്റത്. സ്വകാര്യ ധനകാര്യസ്ഥാപനത്തിലെ ജീവനക്കാരനായ രാഹുൽ ജോലിസ്ഥലത്തേക്ക് പോകുമ്പോൾ കഴിഞ്ഞദിവസമായിരുന്നു സംഭവം. മെഡിക്കൽ കോളേജിൽ ചികിത്സയ്ക്കുശേഷം ചൊവ്വാഴ്ച രാത്രി രാഹുൽ വീട്ടിൽ തിരിച്ചെത്തി. 10 ദിവസത്തെ വിശ്രമത്തിന് ഡോക്ടർമാർ നിർദേശിച്ചതായി രാഹുൽ പറഞ്ഞു. നടുവത്തൂരിൽനിന്ന് കൊയിലാണ്ടിയിലേക്കുള്ള യാത്രാമധ്യേ ബൈക്കിൽ അല്പദൂരം സഞ്ചരിച്ചപ്പോൾ രാഹുലിന് തലയുടെ വലതുഭാഗത്ത് അസഹ്യമായ വേദന അനുഭവപ്പെട്ടു. ഹെൽമറ്റ് ഊരി പരിശോധിച്ചപ്പോഴാണ് ഉൾഭാഗത്തായി വെള്ളിക്കെട്ടൻ ഇനത്തിൽപ്പെട്ട പാമ്പിനെ കണ്ടത്.
